遺囑有真假，高爾夫球記分卡有沒有真假？答案是：有真有假。當然，這裡說的不是城中熱話的真假遺囑，而是記分卡上的桿數是真是假。

遺囑派上用場時，一定是立遺囑人仙遊之後。而記分卡的用處是打完18洞，雙方對過桿數確實無誤，互相簽名後交給賽事委員會；就算只是友儕間賭賭球，大家對過計分卡便埋數可也。

死無對證

最重要的是，雙方球員當時也是活生生的人，就算有錯，很多時可以當場了斷，絕不會死無對證，審死官。

照理分析，假記分卡只能騙自己，騙不到人。所以，如果哨牙通懂得打高爾夫球的話，以下可能是他仙遊後，在天堂或地獄重遇小甜甜，結伴打高爾夫球時的對話（補充：天堂和地獄也有高爾夫球場的，他們是打逐洞賽，很認真地記分。）：

第一洞(458 yd, Par 4）：

小甜甜：我明知財富解決不到人生的問題，唉！連在果嶺上也一樣。你看，我連一呎也推不進。

哨牙通：推不推進不要緊，最緊要係立咗遺囑。

第二洞(351 yd, Par 4）：

小甜甜（1D）：2004年我已知生癌，Dr. Goldstein和我做過手術，就好似這個洞，「切（chip）」錯少少也會死人。

哨牙通：妳不是早已在2002年立咗遺囑，怕乜唧？

第三洞(568yd, Par 5）：

小甜甜（AS）：去完波士頓、新架坡，2005年回到香港就知冇得醫。

哨牙通：妳要唔要打多個mulligan，或者立過份遺囑俾我好的呀？

第四洞(188yd, Par 3）：

小甜甜（1U）：唉！生命有mulligan梗係好啦，有時打唔完18洞就真係打唔完。

哨牙通：老婆豬，不要諗太多，打得幾多便幾多啦，我先同妳按兩嘢。

第五洞(436yd, Par 4）：

小甜甜（2U）：好舒服，你好耐冇同我按過呀！舒服過一桿進洞。

哨牙通：鬼叫妳2007年死咗。

第六洞(485yd, Par 4）：

小甜甜（3U）：你仲好講，一個唔該就整份2006年遺囑出來，即係打一場波有兩張計分卡，都有我簽名，條數點計?

哨牙通：有埋caddy簽名做證㗎。

第七洞(186yd, Par 3）：

小甜甜（3U）：你估個法官傻㗎? 他都唔信我會在譫妄（delirium）的情況下簽你嗰份什麼什麼Specific Bequest Will 2006啦。

哨牙通：唉！我都唔知點駁你。

第八洞(459yd, Par 4）：

小甜甜（2U）：有埋字迹專家鑑證，有哂ballmark，你估話一桿進洞就一桿進洞，或者明明打五桿夠膽報四桿。我Nina簽名〝i〞字嗰點係有十一點鐘傾斜，都算你學得好似，但哈哈！始終逃不出專家Mr. Westwood和Mr. Radley的法眼，唔係白老虎Lee Westwood同Radley Run呀！

哨牙通：喂！我這個洞真係打四桿，par咗，無假㗎！

第九洞(463yd, Par 4）：

小甜甜（2U）：點知你有冇係果嶺嗰洞種生？風水師！

哨牙通：唉，我咪話過我唔識風水，係妳至信我唧。

小甜甜（發脾氣）：喂！你係未咁呀，生前又叫我做乜做物，而家又話唔識風水。同你打波真冇癮，唔打啦！

哨牙通：喂！大小姐，我仲輸緊兩個洞，妳唔打埋下九我點上訴呀？

小甜甜：你自己上訴到夠啦！（說完便化作一縷輕煙飄到洞內去。）（完）

#####

本文原於《Golf Digest/高球文摘》香港版刊出

[ #高球風雲 ]